Peqqussutissatut siunnersuummut nassuiaatit

 

Nassuiaatit nalinginnaasut

Peqqussutissatut siunnersuut piginneqatigiilluni inissiaateqarnermik aaqqissuussinerup nutarteriffigineqarneranut ingerlareersumut ilaavoq. Aaqqissuussineq maannakkut atuuttoq malillugu tapersiissuteqartoqarnissaanik kingornatigullu tunniunneqarnissaannik inaarutaasumik neriorsuuteqartoqannginnerani pissutissaatitaasut arlallit piginneqatigiillutik inissiaatillit peqatigiiffiisa eqquutseqqaarsimassavaat.

Peqqussut atuuttoq malillugu namminersortutut sanatitsisartoq piginneqatigiillutik inissiaatillit peqatigiiffianut tunisinissani siunertaralugu inissianik sananissaminik kissaateqartoq sanaartornerup aallartinneraniilli piginneqatigiillutik inissiaatillit peqatigiiffianik inissiat pisiarineqarnissaat pillugu isumaqatigiissuteqareersimassaaq. Inissiat piginneqatigiillutik inissiaatillit peqatigiiffianni pilersinneqareersimasumi ilaasortat amerlassusiannik amerlaneruppata maleruagassat atuuttut malillugit peqatigiiffimmi piginneqataasussanik allanik ilanngutsitsisoqarsinnaasimanngippat kikkut peqatigiiffimmi ilanngussinnaanerat tulleriinnilersorneqarpoq. Ilannguttussatut siulliullugu kommuni neqeroorfigineqassaaq, tulliullutik ilannguttussatut neqeroorfigineqassallutik Namminersornerullutik Oqartussat periarfissatullu kingullertut namminersortutut sanatitsisoq ilanngunnissaminut pisussaatitaalluni.

Peqqussutissatut siunnersuutip kingunerissavaa sanaartornerup aallartinneraniilli piginneqatigiillutik inissiaatillit peqatigiiffianik pilersinneqareersimasumik isumaqatigiissuteqareersimasariaqannginneq. Peqatigisaanik atorunnaarsinneqarpoq kommunip, Namminersornerullutik Oqartussat imaluunniit namminersortutut sanatitsisartup piginneqatigiillutik inissiaatillit peqatigiiffianni ilanngussinnaanerat.

Peqqussutissatut siunnersuutip allannguutit oqimaatsut kingunerissanngilai, kisianni taamaallaat siunertaraa piginneqatigiillutik inissiaatillit peqatigiiffiisa taperserneqarnissaminnik qinnuteqaataasa eqaannerusumik aqutsivigineqalernissaasa qularnaarneqarnissaa. Innuttaasunut ataasiakkaanut iluaqutaasussamik nuannaarutaasussamillu maleruagassiuivallaannginnissamik allaffissornerullu pisariillisaavigineqarnissaanik Inatsisartut Naalakkersuisullu kissaateqarnerat peqqussutissatut siunnersuut aamma kinguneraat.

Peqqussutissatut siunnersuut isummerfigeqqusissutigineqarsimavoq ukununnga A/S Inissiaatileqatigiiffik INI, KANUKOKA, SIK, G.A., Grønlandsbanken A/S, Sparbank Vest, Nuup Kommunia, Aningaasaqarnermut pisortaqarfik aamma Aqutsinermut Pisortaqarfik. Siunnersuut aaqqiissuteqarfigineqarpoq isummerfigeqqusissutinut akissutit takkussimasut mianeralugit. Maleruagassanik siunnersuutigineqartutut pisariillisaanermut pingaartumik aningaasalersuisarfiit tapersiipput.

Allaffissornikkut kingunerisassai

Peqqussutissatut siunnersuut allaffissornikkut kommuninut imaluunniit Namminersornerullutik Oqartussanut nammagassiinerussanngilaq, akerlianilli nassatarissallugu pisortat tapersiissuteqarnissaannik qinnuteqaatit suliarineqartarneranni kingornatigullu taarsigassarsiarititat aqutsivigineqarneranni periutsit pisariinnerulernissaat.

Attartortut allat inissianik piginneqatigiillutik inissianngortitsineranni attartortup attartortutut najugaqaannarsinnaatitaanini atorpagu inissianik piginnittuusup inissiap attartukkap aqutsivigineqarnera qularnaassavaa. Naatsorsuutigineqarpoq attartornerit taamaattut aqutsivigineqarnerat allaffissornikkut immikkut nammagassiissanngitsut.

Aningaasatigut kingunerisassai

Peqqussutissatut siunnersuut piginneqatigiillutik inissiaatillit peqatigiiffiinut ataasiakkaanut aningaasatigut kinguneqassanngilaq. Peqqussutissatut siunnersuutikkut piginneqatigiillutik inissiaatillit peqatigiiffii inissianik nutaamik sanaanik inissiaateqarnermut aningaasaateqarfimmit imaluunniit entreprenørimit pisisunut sullissineq eqaannerulersinneqassaaq.

Piginneqatigiilluni inissianik inissiaateqarnermut aningaasaateqarfimmit imaluunniit entreprenørimit sananeqartunik piserusunneq peqqussutissatut siunnersuutikkut anginerulersinneqassasoq naatsorsuutigineqarsinnaavoq, tassa inissiat taamaattut annertuumik ingerlatsinikkut iluaqutissat iluaqutigalugit aammalu kvadratmeterimut akikinnerusumik sananeqarsinnaassasut naatsorsuutigineqarmat.

Inissiat attartortittakkat piginneqatigiilluni inissianngortinneqarnerannut atatillugu attartortut sinneruttut aqutsivigineqarnerat immikkut akissaajaataalissappat inissianik piginnittuusup akissaajaatit taakku immikkut akilissavai. Illuatungaatigut Naalakkersuisut kommunalbestyrelsilluunniit piginneqataassutimik tuninerisigut naleqarnerulissutaasimasinnaasut pissarsiarissavaat.

 

Aalajangersakkanut ataasiakkaanut nassuiaatit

§ 1- imut

§ 1, nr. 1 aamma nr. 2-mut

Aalajangersagaq inissiat inissiaateqarnermut aningaasaateqarfimmit imaluunniit entreprenørimit sananeqartut pineqarpata kommunip, Namminersornerullutik Oqartussat imaluunniit namminersortutut sanatitsisup piginneqatigiillutik inissiaatillit peqatigiiffiani piginneqataasunut ilanngussinnaatitaanerisa peerneqarnissaanut siunnersuutip kingunerisaanik iluarsiineruvoq.

Inissiat attartortittakkat pioreersut piginneqatigiilluni inissianngortinneqarneranni piginneqatigiillutik inissiaatillit peqatigiiffianni ilaasortanngornissaminnik kissaatigisaqanngitsunik attartortoqarpat Naalakkersuisut imaluunniit kommuni piginneqataasunut ilanngussinnaapput piginneqatigiillutillu inissiaatillit peqatigiiffianni ilaasortanngorsinnaallutik. Taamaalilluni attartortoq Namminersornerullutik Oqartussani kommunimiluunniit attartortutut ingerlaannarsinnaavoq. Taamaalillunilu attartortup pisinnaatitaaffimminik piginniinnarnissaa qularnaarneqassaaq.

Piginneqatigiillutik inissiaatillit peqatigiiffiata Naalakkersuisut kommuniluunniit ineqarnermut akiliutissanik piginneqatigiillutik inissiaatillit peqatigiiffiata ataatsimeersuarnerani aalajangerneqarsimasumik akileeqqussavai. Attartortoq Namminersornerullutik Oqartussat kommunillu inissiaataanni attartortittakkani ineqarnermut akiliutit naatsorsorneqartarnerat pillugu maleruagassat atuuttut malillugit akileeqquneqartaannassaaq. Tamatuma kingunerisinnaavaa ineqarnermut akiliutissap Naalakkersuisunut kommunimulluunniit piginneqataasunut ilaasutut akileqquneqartumit ineqarnermut akiliutissatut attartortumit Naalakkersuisut kommunilluunniit akileqqusassaanit allaanera. Taamaakkaluartoq pingaarpoq aalajangiusimassallugu attartortup maannamut pisinnaatitaaffimminik piginniinnarnissaa.

Taamaattorli inissiaqarfik attartortittagaq pioreersoq piginneqatigiillutik inissiaatillit peqatigiiffianut tunniunneqarsimappat Naalakkersuisut kommunalbestyrelsiluunniit suli piumasaqaatigisinnaavaat inissianik ininilluunniit peqatigiiffimmit attartortinneqarsinnaanissartik.

Aalajangersakkap aamma kingunerissavaa piginneqataasunut ilaasup piginneqatigiilluni inissiamut ataasiinnarmut atuisinnaatitaanissaanik killiliinermi Naalakkersuisut kommunilluunniit pineqannginnissaat. Aalajangersakkap ilanngullugu kingunerissavaa Naalakkersuisut kommuniluunniit piginneqataasunut ilanngukkunik piginneqatigiilluni inissiamik attartortitsisinnaanermut killiliinermi pineqannginnissaat, tak. § 42. Tamatumuuna attartortut inissiaqarfiup attartortittakkap attartortunit allanit piginneqatigiilluni inissianngortinneqarneratigut attartortuuinnartut mianerineqarput.

Assersuutigalugu inissiaqarfimmi attartortittakkami 20-nik inissiartalimmi attartortut 3/4-iisa piginneqatigiinnikkut inigisatik pisiariumappatigit attartortullu 1/4-iisa attartortuuinnarnissartik kissaatigigaat, taava tamatuma kingunerissavaa Naalakkersuisut kommunilluunniit attartukkanut tallimanut piginneqataasutut ilanngunnerat.

Piginneqataasut attartortullu taama aggulunnerat ajornartorsiutaasinnaasutut Naalakkersuisut isumaqarfiginngilaat, tassa nikingassut aallaqqaammulli ilisimaneqareermat, tamatumalu peqatigisaanik Naalakkersuisut kommuniluunniit piginneqataasunut ilaasutut piginneqatigiillutik inissiaatillit peqatigiiffianut illuatungaanilu attartortumut aningaasatigut qularnaveqqusiisuulluni. Piginneqatigiillutik inissiaatillit peqatigiiffiata ineqarnermut akiliutissat il.il. piginneqataasumut, t.i. Naalakkersuisunut kommunimulluunniit, akileqqussavai attartortoq saaffiginnissasoq Naalakkersuisunut kommunimulluunniit pisortat inissiaataannik attartortittakkamik attartortisutut.

§ 1, nr. 3-mut

Aalajangersakkamut maannamut atuuttumut naleqqiullugu aalajangersagaq allannguutaanngilaq paragraffimulli pineqartumut eqqortumik innersuussinissaq pillugu iluarsiissutaannaalluni.

§ 1, nr. 4-mut

Aalajangersakkakkut maleruagassiuiffigineqarpoq qaqugu suullu pissutissaatillugit piginneqatigiillutik inissiaatillit peqatigiiffiannut tapersiissutit tunniunneqarsinnaanerat.

Piginneqatigiillutik inissiaatillit peqatigiiffiinut nammineq sanatitsisuusunut pisortat tapersiissutaat tunniunneqassapput atuisinnaatitaalernermut allagartap uparuaavigineqarsimanngitsup takutinneqarneratigut. Piginneqatigiillutik inissiaatillit peqatigiiffiinut inissiaateqarfimminnik inissiaateqarnermut aningaasaateqarfimmit imaluunniit entreprenørimit pisisunut tapersiissutit tunniunneqarnissaanni ilanngullugu piumasaqaataavoq inissiat piginneqatigiillutik inissiaatillit peqatigiiffiannut pilersinneqareersimasumut tunniunneqarnissaat.

§ 1, nr. 5-imut

Aalajangersakkamut maannamut atuuttumut naleqqiullugu aalajangersagaq allannguutaanngilaq paragraffimulli pineqartumut eqqortumik innersuussinissaq pillugu iluarsiissutaannaalluni.

§ 1, nr. 6-imut

Aalajangersakkami taarsigassarsisitsisussap tapersiissuteqarnissaminik allanngortinneqarsinnaanngitsumik neriorsuuteqannginnerani pissutissaatitaasut suut eqquutsinneqarsimanissaat aalajangersarneqarput. Taamaattumik sanaartugassatut pilersaarut qinnutigineqartoq aningaasallu qinnutigineqartut neriorsuuteqarnissami tunngavigineqassapput. Sanaartugassatut pilersaarut aningaasartaaluunniit kingusinnerusukkut allanngortinneqarpata neriorsuummi pissutissaatitaasut immaqalu tunngavigisat allannguuteqassapput. Tamatuma nassatarisinnaavaa neriorsuutip taamaattutut atorunnaarnera.

Aalajangersakkap kingunerissavaa piginneqatigiillutik inissiaatillit peqatigiiffianut nammineq sanatitsisuusumut Naalakkersuisut neriorsuuteqarnissaasa Inatsisartut aningaasanut inatsisaanni erseqqissumik tunngavissaqarnissaa.

§ 1, nr. 7-mut

Aalajangersagaq piginneqatigiilluni inissiat pillugit inatsisartut peqqussutaata allanngortinneranik inatsisartut peqqussutaata nr. 11, 6. november 1997-imeersup iluarsiivigineqarnerata kinguneraa. Aalajangersakkami siusinnerusukkut innersuutigineqaproq § 10, imm. 2.

 

§ 2-mut

Siunnersuutigineqarpoq allannguutit 1. januar 2002-miit sunniuteqartumik ulloq 1. juli 2002 -mi atortuulissasut.

Piginneqatigiillutik inissiaatillit peqatigiiffiat Naalakkersuisunut kommunimulluunniit piginneqataasunut ilannguttumut ineqarnermut akiliutissamik inissiamut atuisinnaatitaaffiusumut atasumut akileeqqusisuusussaavoq. Inissiap attartortittakkap piginneqatigiillutik inissiaatillit peqatigiiffianut tunniunneqareerneratigut attartortut attartortuuinnartut ineqarnermut akiliutissanik Namminersornerullutik Oqartussat kommunillu inissiaataanni attartortittakkani ineqanermut akiliutit naatsorsorneqartarnerat pillugu maleruagassat sukkulluunniit atuuttut malillugit akileqquneqartassapput.

Tamatuma kinguneraa inissiamut attartortumit piginneqatigiillutik inissiaatillit peqatigiiffianut ilaasortanngornissaminnik kissaatigisaqanngitsumit najugarineqartumut Naalakkersuisut kommuniluunniit piginneqataaffigiligaanut ineqarnermut akiliutit iluarsiivigineqarnissaat kalerriutigineqassammat. Ineqarnermut akiliutit qaffaavigineqarnissaat qaammatinik pingasunik sioqqutsilluni qaammatip naanerani qaffannissaat kalerriutigineqassaaq ineqarnermut akiliutit appaavigineqarnissaat qaammatip naaneranut kalerriutigineqassasut.